CONCELLO E ACISA FAN UNHA VALORACIÓN MOI POSITIVA DA FESTA

INDIANA CELEBRADA O VENRES E O SÁBADO. PARA O ALCALDE

“PARECE QUE RIBADEO ESTABA A AGARDAR POR ESTA CITA” E

AMOSOUSE CONVENCIDO DE QUE HABERÁ UNHA NOVA EDICIÓN

O PRÓXIMO ANO. NO MESMO SENTIDO SE PRONUNCIOU ROBERTO

RAMOS, O PRESIDENTE DA ASOCIACIÓN DE COMERCIANTES.

O alcalde, Fernando Suárez, fixo unha

valoración moi positiva da festa indiana que tivo lugar o venres e o sábado

pasados na localidade. O rexedor dixo que “parece que Ribadeo estaba a

agardar por esta festa”.

Suárez Barcia declarou que “realmente non nos saen as palabras para describir

o que significou esta festa indiana de Ribadeo. Non nos saen as palabras polo

marabilloso que foi todo o proceso de debate entre o Concello e a Asociación de

Comerciantes, desde hai dous ou tres meses que empezamos a debullar como

poderíamos facer un reclamo para que a xente de Ribadeo se puidera implicar.

E a verdade é que se tocou a tecla axeitada porque a resposta dada tanto o

venres pola tarde-noite como o sábado durante todo o día é algo do que se fala

non só en Ribadeo senón en medio país, do ben que saíu e de cómo a xente de

Ribadeo e a de fóra viñeron e caracterizáronse como auténticos indianos”.

O alcalde sinalou: “parece que Ribadeo estaba a agardar por esta festa.

Quero destacar a colaboración entre o Concello e Acisa para estas e outras

cousas, porque isto redundou de maneira positiva en todo o comercio, que

estivo durante moitos días vendendo moito material para que a xente se

puidese caracterizar, o que significou para a hostalería, para os bares,

restaurantes… toda esta marea de xente que estivo disfrutando da festa.

E o que significou tamén para recuperar a memoria histórica, o legado dos

que se marcharon a facer as Américas, algúns o lograron, pero outros non

desgraciadamente. Aqueles que as fixeron moitos deles se acordaron de

contribuír ao desenvolvemento da nosa terra tan falta de cariño e autoestima

moitas veces”.

Para Fernando Suárez “a homenaxe que as xentes de Ribadeo lles demos a

todos estes emigrantes, a todos estes indianos, pagou a pena todo o esforzo

feito e consolidou esta festa. Estamos absolutamente convencidos, tanto desde

Acisa como desde o Concello, que haberá unha nova edición o vindeiro ano e

que será un dos eventos máis importantes que puidéramos ter feito nunca aquí

en Ribadeo”.

Pola súa banda, Acisa tilda de éxito rotundo a festa indiana que se celebrou o

venres e o sábado na localidade. Miles de persoas caracterizáronse para render

homenaxe aos que un día emprenderon viaxe en busca dun futuro mellor.

Dende Acisa o seu presidente, Roberto Ramos, sinala que “a festa que

organizamos o Concello e Acisa foi un éxito. Sabiamos que calara entre a

poboación, pero levámonos unha grata sorpresa porque se superaron todas as

previsións que nos fixeramos inicialmente. O evento tivo unha grande acollida

entre os comercios e os locais hostaleiros, xa que entre uns e outros foron

preto de 100 os que se implicaron directamente na festa. A todos eles lles

queremos agradecer o traballo destes días. E logo a todos os veciños e veciñas

de Ribadeo que lle deron vida e cor a esta cita e a todos os que chegados

doutros puntos da Mariña lucense e do Occidente asturiano para gozar das

actividades que se levaron a cabo tanto o venres coma o sábado”.

Dende Acisa engaden que “é unha satisfacción ver a acollida que tivo a primeira

edición da festa indiana. Dende o pregón, as charlas, as actuacións musicais, a

verbena, a gynkana… A xente pola rúa demandábanos xa máis días de duración

de cara ao próximo ano, pedíannos que se prolongase de venres a domingo. E

os miles de turistas que estes días gozan das súas vacacións na zona tamén se

mostraron gratamente sorprendidos coa festa do Ribadeo Indiano”.

Roberto Ramos destacou o traballo conxunto realizado durante meses polo

Concello e a Asociación de Comerciantes, Industriais, Servizos e Autónomos

de Ribadeo para que esta festa se levase a cabo. E engadiu que “despois do

verán faremos análise e balance sobre o que significou esta primeira festa

indiana para Ribadeo e nos poñeremos a traballar na próxima edición”.