A concelleira de Turismo, Marta Saiz, contou que “presentamos hoxe a imaxe da nova edición do Ribadeo Indiano, evento no que levamos traballando dende hai varios meses coa ilusión de seguir a mellorar e espallar polo mundo adiante o que se ten convertido nunha das referencias fundamentais do verán”.

Saiz manifestou: “un programa cargado de propostas diferentes para facer que o Ribadeo Indiano reluza con máis esplendor, e que terá os seus días fortes durante a fin de semana do 12 ao 14 de xullo”. E anunciou que “como novidade, o Ribadeo Indiano será presentado formalmente nas capitais galega e asturiana. O 31 de maio será en Santiago de Compostela e o 7 de xuño en Oviedo”.

A presidenta de Acisa, Carmen Cruzado, subliñou que “estamos a falar da fin de semana máis importante do ano para a hostalería e para o comercio e duns días moi fortes para os aloxamentos, sobre todo de Ribadeo, pero tamén doutros concellos tanto de Galicia como da veciña Asturias. A estas alturas xa podemos adiantar que a ocupación hoteleira está practicamente ao 100% na nosa vila”.

Na presentación do cartel do IX Ribadeo Indiano, que tivo lugar no Concello, participaron o alcalde, Dani Vega, as concelleiras de Turismo, Cultura, Benestar Social e Seguridade, Marta Saiz, Begoña Sanjurjo, Elena Sierra e Montse Seijo, a presidenta de Acisa, Carmen Cruzado, e o xerente do colectivo empresarial, Jesús Pérez.